البرمجة ببساطة هى عملية تنفيذ اوامر محددة لتحقيق مهمة محددة. كلمة برنامج لا تقتصر فقط على الكمبيوتر لكنها تشمل مجالات كتيرة.
مثلاً، البرنامج التلفزيوني هو مجموعة خطوات بتتنفذ بترتيب معين علشان تصنع حلقة. يعني مثلا مقدم البرنامج بيبتدي الحلقة بمقدمة عن الموضوع، بيبدأ يعرض شوية تقارير، ممكن يجيب ضيف يحاوره في الحلقة وياخد مداخلات تليفونية بعدها يختم وتنتهي الحلقة. هنا، الترتيب له اهمية في التنفيذ. يعني مينفعش مثلا المقدم ياخد تليفونات وهو لسا معملش مقدمة عن الحلقة. المهمة المحققة هنا هى "حلقة كاملة عن موضوع ما"
حاجة تانية ممكن البنات يبقوا فاهمينها اكتر مثلاً البرنامج الموجود في الغسالة. لما بتيجي تغسل هدوم، بتختار برنامج محدد لعملية الغسيل والغسالة بتنفذه بالترتيب والمهمة المحققة هنا هى "هدوم نضيفة"
لو لاحظتم النمط، دايما البرنامج بيكون عبارة عن خطوات لها ترتيب محدد ودايما ما بينتهي بتحقيق وظيفة او مهمة محددة.
برنامج الكمبيوتر في الاساس بيبقى الهدف منه حل مشكلة او مجموعة مشاكل. يعني مثلا برامج طلب الاكل حلت مشاكل كتير زي انك تنزل تروح تجيب الاكل او انك تضطر تكلم الكول سنتر علشان تعمل الاوردر. برامج زي اوبر وكريم ساعدت في توفير بديل للمواصلات العامة. برامج تنظيم الوقت والمهام قللت بشكل كبير من الاعتماد على الاجندات والمذكرات الورقية. برامج زي واتساب وماسنجر وفرت بديل اكتسح وهيمن على سبل التواصل التقليدية بين الناس.
البرمجة تعد من اهم الوظائف في المجال التكنولوجي وبتتطور اشكالها وقدراتها وامكانياتها بسرعة خرافية. الدراسات بتشير ان وظائف البرمجة حاليا متعددة وكتيرة وهتكون الاكثر والاوسع انتشارا في المستقبل
بيتم التحضير حاليا لمجموعة فيديوهات في موقع جيك فالي هنتكلم فيها عن تاريخ تطور البرمجة، مجالات البرمجة المختلفة واللغات المشهورة، طرق تعلمها أونلاين سواء مجانا او بمقابل مادي.
سجل ايميلك علشان توصلك الفيديوهات دي اول ما تنزل على الموقع ومقالات وكتب الكترونية مجانية عن لغات برمجية مختلفة.
ليست هناك تعليقات:
إرسال تعليق