كنت بكتب طعن بالنقض في اتجار مخدرات ، فلما تصفحت ورق القضية لقيت فيه فرق في الوزن حوالي ٢٠ جرام ، وبصيت في الحكم لقيت القاضي مردش على هذه المسأله ، لكني تفاجئت ان الزميل الحاضر لم يدفع بوجود هذا الفارق الكبير في الوزن !!
او يمكن يكون دفع بيه ، لكن علي الاقل هذا الدفع غير ثابت بمحضر الجلسه .... وبالتالي فالمحكمه ليست ملزمه بالرد علي دفع لم يثار امامها.
كمان لقيت الزميل ثابت في محضر الجلسه انه اكتفي باقوال الشهود الوارده في التحقيقات وتنازل عن طلب سماعهم امام المحكمة.
وده فكرني بمرافعة للاستاذ فريد الديب لما طلب من المحكمة سماع شهود والمحكمه رفضت ، فاثبت في محضر الجلسة ما يلي ( هذا ولما كان الدفاع الحاضر قد سبق وان طلب سماع الشهود فلان وفلان ، الا ان المحكمه رفضت ، الامر الذي وضع الدفاع في حرج ، فقبل الترافع في الدعوى بحالتها ).
شوف الفرق بين سلوك كلا المحامين ، الاتنين تنازلوا عن سماع الشهود ، لكن شوف الاول اثبت ايه في محضر الجلسه والاستاذ الديب اثبت ايه .. هتقولي وايه الفرق ؟!
الفرق ان فيه حكم نقض ذكر ان رفض المحكمة سماع شاهد ، سبق للدفاع ان ألح في طلب سماعه ، ثم ترافع الدفاع بدون سماع ذلك الشاهد لانه شعر بالحرج من المحكمه ، هذا الامر يُبطل الحكم لانه يعتبر اخلالا بحق الدفاع.
( وطبعا الحكم ده قبل تعديل القانون فيما يتعلق بحق المحكمه في عدم سماع الشهود ).
الشاهد ايه من كل ده ؟!الشاهد انك بتعمل حساب لكتابة اسباب النقض ، من وانت لسه في المرحله الاولي ، وبتزنق القاضي في الدفوع والطلبات ، او زي ما بنقول ( تدق مسامير في الحكم قبل صدوره ) عشان لما يصدر بالادانه ، يكون فيه اسباب كافيه لنقضه.
لكن هتحضر امام المحكمه وتترافع عشر ساعات ، ومفيش ولا كلمة ثابته في محضر الجلسة ، وهتاخد حكم ، وتيجي تكتب نقض ، هتبص في محضر الجلسه مش هتلاقي غير دفعين تلاته اللي ثابتين ، والمحكمه ردت عليهم رد سائغ ومقبول ، قولي بقي هتكتب النقض بناء علي ايه ؟!
اتذكر يوم نقض حكم اعدام هشام طلعت ، اتصل الاستاذ بهاء ابو شقه باحد البرامج وقال : انا السبب في نقض الحكم ، لان المحامي الاول ( يقصد الديب ) كان موجود وجاب اعدام. فاتصل الاستاذ الديب ورد بجمله واحده : ان كتابة النقض بتكون مؤسسه علي الدفوع التي سبق للدفاع وابداها امام المحكمه ، ولو انا مكنتش ابديت امام المحكمه هذه الدفوع لما كانت عجزت عن الرد عليها ولما كان تم نقض الحكم 
....
واخيرا عارف ليه قضاه الجنايات مش بتحب تاخد مذكرات ؟
مش بس لان الاصل المرافعة الشفويه ، كمان لانك هتزنقه بالمذكرة لانه لازم يرد على كل كلمه فيها في حكمه رد سائغ مقبول ، والا حكمه هيتنقض ، لذلك الاحسن للقاضي انه يسمع منك كلمتين ، ويتثبت في محضر الجلسه كلمتين ، هيرد عليهم وشكرا ، وتيجي تعمل نقض هياخد رفض.
منقول
ليست هناك تعليقات:
إرسال تعليق