لو انت تايهه ومش عارف تكتب رسالتك يبقى البوست ده ليك ..
في ناس كثير بتسأل ع أسس كتابه الرسائل العلمية , ومش عارف يكتب ازاي ولا يبدأ بأيه ؟؟
انا هجيب ليكم الزتونة الموضوع بناء على ماتوصلت اليه في كتابتي للرسالة ..
في البداية لازم تعرف ان في ضوابط للكتابة وأهمها :
1- تكون العناوين الرئيسية بالخط العريض Bold بالضغط على (Control + B), وبتكون بـ Font أكبر من العناوين الفرعية .
2- المسافة بين السطور تتراوح بين 1.5 – 2 سم .
3-نوع الخط المستخدم في كتابة الرسالة هو Times New Roman ده بالنسبة للجزء الإنجليزي , اما بالنسبة للمخلص العربي ف بيتكتب بخط Simplified Arabic.
4-مراعاه ترقيم الصفحات في الأسفل .
5-لو في جداول او رسوم بيانية لازم تشير ليها عند كتابه الرسالة وماتكتبهاش في منتصف النص لكن بتتكتب في اخر النص .
6-الترقيم مهم في كتابتك للرسالة ..
ده غالباً اهم النقاط اللي لازم تأخذ بالك منها ..
هنيجي بقا لخطوات الكتابة ودي هتكون بناء على الرسائل اللي بتتكتب باللغة الإنجليزية وهنشرح كل جزء منها دلوقتي ..
اولا: الرسالة بتقسم الي اجزاء هما :-
1-الغلاف الخارجي
2- Approval sheet
3- Acknowledgement
4- Abstract
5- Contents
6- List of table
7- List of figures
8- List of abbreviation
9- Introduction
10- Aim of the work
11- Review of literature
12- Material and Methods
13- Result and discussion
14- Summary
15- References
16- الملخص العربي
ثانياً: هنأخذ جزء جزء ونشرحة ..
1-الغلاف الخارجي :- هيكون بالشكل اللي ف الصوره دي
2- Approval sheet :- هيكون بالشكل اللي ف الصوره دي
3- Acknowledgement
هنا بتكتب شكر وتقدير للدكاتره بتوعك
4- Abstract
هنا بتكتب ملخص للرسالة كلها بصوره مبسطة ومش بتتعدي نص او صفحة ..
5- Contents
هنا بتكتب الفهرس بتاعك .. بتكون الاجزاء الرئيسية بالخط العريض علي Font (16) والعناويين الفرعية على Font (14 )
اوقات بتحتاج تكتب عناوين فرعية الفرعية بمعني مثلاً ...
3- Material and methods (Font 14) Bold
3.1. ( font 14 ) برضة بس مش هيكون Bold
3.2.
..... وهكذا
6- List of table
هتلاقي جداول عندك هتكون مترقمه هتعمل جدول تكتب فيه اسم كل جدول والرقم بتاعة .
7- List of figure
هتلاقي عندك في تحليل الاحصاء بتاعك رسوم بيانية للجداول دي هتعمل نفس الفكره هتأخذ اسم الرسم البياني وتحط جنبة الرقم .
8- List of abbreviation
وانت بتكتب الرسالة هتقابلك بعض الاختصارات .. اللي هتستدعي المشرف يسألك هو ده اختصار ايه ؟؟؟ محتاج يعرف الاسم الكامل ليها
ساعتها هتكون مجهز نفسك وعارف اختصاراتهم ايه .. هتقولي طيب اجيب منين الاسم الكامل ده ؟؟
اي جزء في اي بحث حبيت تأخذ الـ Reference بتاعة هتلاقي جنب الاختصار الأسم الكامل ليها .
9- Introduction
هنا بتكتب مقدمة عن الرسالة تعريف بالشغل بتاعك وممكن تستدل من الابحاث المنشوره اجزاء منها تتكتب مع كتابة اسم العالم جنبها ..
غالبا الجزء ده ماطولش كتابه فيه أفضل , هتخلص ولسه هتقفل كتابه فيه هتكتب جزء ( The aims of the present study ) هتكتب فيه انت هتدرس ايه في رسالتك دي , وهدفك ايه ؟ ..
دي في حالة لو ماكتبتش جزء منفصل ليها زي رقم 10 اللي هقوله ده ..
10- Aim of the work
بعض المشرفين مابيحبوش يكتبوا الجزء ده وبيكتفي باللي كتبه في Introduction ..
لو حبيت تكتبه منفصل هتشرح فيه انت ناوي تعمل ايه في رسالتك ؟
وهدفك ايه اللي عاوز توصل ليه !
11- Review of literature
معلش الجزء ده طويل ومهم تركز فيه ..
هنا بتكتب فيه الـ Abstract بتاعت الابحاث السابقة اللي جمعتها ..
نقطة مهمه لازم تأخذ بالك منها , ازاي اجمع ابحاث ؟؟ واحفظهم ازاي ؟ وايه ابسط طريقة ليها ؟
هقولك بصوره مبسطة جدا , وانا عارفه انها هتفيدك ..
انت هتعمل سرش ع الابحاث اللي تخص موضوعك , طيب انت دخلت جوجل او اي موقع بحث ولقيت ابحاث كثيره ! ومش عارف ايه اللي يفيدك منهم ؟
اي بحث هتلاقي مصطلحات جديده مش عارفها لو قرأت بحث ف موضوعك بتمعن هتعرف المصطلحات الجديده وهتسهل عليك كثير جدا ..
طيب انا برضه لسه ماوصلتش لحل سريع واخلص من الحوار ده ازاي ؟؟؟
ادخل افتح ابحاث كثيره من غير ماتحملها وافتح صفحه فيها ترجمه جوجل التعبانه دي 
خذ الـ Abstract بتاعت بحث بحث مفتوح قدامك واقرأ بسرعه الترجمه مش مهم ترجمتها انا عاوزاك تبص ع الملخص بتاع الترجمه هيفيدك ولا لأ ؟؟ هيفيدك يبقي تمام هتحفظة عندك وهكذا ..
خذ الـ Abstract بتاعت بحث بحث مفتوح قدامك واقرأ بسرعه الترجمه مش مهم ترجمتها انا عاوزاك تبص ع الملخص بتاع الترجمه هيفيدك ولا لأ ؟؟ هيفيدك يبقي تمام هتحفظة عندك وهكذا ..وبعد ماتخلص خالص ابقي امسك بحث بحث وشوف انت عاوز ايه ؟!
هتقولي طيب ف طريقة للحفظ ؟؟ طبعا لازم يكون ف طريقة سهله ..
وانت بتنزل الابحاث اعمل Folder وحط فيهم الابحاث مرقمة بالارقام .. هتقولي ليه ؟ ده بتسهل ليك انك ترجع للبحث بعد ماتكتبه ف الرساله ؟
طب ازاي ؟؟؟؟
المشرف هيقولك انا عاوز البحث اللي نقلت منه الـ Abstract دي ؟؟ هتحتاس كدا ..
وبالتالي :- جنبك ورقه اي بحث كتبته ف رسالتك اكتب رقمه بما ان ف ابحاث مش هتتكتب ف علشان ماتهوش ..
ولو حصل وطلب وكنت ناسي اي بحث هتقدر ترجع ليه بسهوله بإنك تأخذ كلمتين من الجزء اللي كتبته وتعمل سرش عليه في ارقام الابحاث اللي انت كتبتها ف ورقة اللي ع جنب دي
هتعمل بحث ازاي ع الكلمتين دول هتضغط ( Control + F) .
وممكن لو حابب طريقه تانيه لو تايهه ومش فاكر اي بحث خذت منه كوبي للنص، هتأخذ جزء من البرجراف وتعمل بيه سرش ع جوجل هيطلع ليك البحث..
شوف الطريقه الاسهل ليك واعملها.
12- Material and Methods
هنا هتكتب خطوات شغلك العملي بالتفصيل وتستدل خطوات العمل بالابحاث واسم العالم .
13- Result and discussion
بتكتب مقدمة بسيطة عن النتائج وتدخل تكتب النتائج بتاعتك .. ولو ف جداول
بتكتب الاول ملخص للجدول ده وبعدها تحط الجدول بتاعك والرسم البياني .
14- Summary
هنا بتكتب ملخص الرسالة بصوره سريعه .. وف الاخير تكتب Conclusion اللي استنتجته من رسالتك دي ايه .
15 – References
هنيجي لأهم جزء في الرسالة واللي هي اكثر جزء هتقولي بتعب فيه !
وكمان لجنه التحكيم بتسيب الرساله كلها وبتبص وبتركز عليه ..
مبدأيا ف برنامج بيساعد علي كتابه المراجع اسمه Mendeley وف كذا برنامج تاني بس ده اللي جربته وساعدني في الكتابه ..
وده لينك الشرح بتاعه
ده هيساعدك في كتابه المراجع لكن ماتعتمدش عليه اعتماد كلي .. هو مجرد حاجه مساعده بتلاقي احيانا اخطاء في اسم العالم ف اتأكد من حروف اسم العالم قبل ماتنقله ف رسالتك
وده شكل مبسط للكتابه المراجع
نقلاً عن د. محمد فكري جزاه الله خيراً اضاف نقطه عن الموضوع ده
فى برنامج اسمه الإند نوت بيفيد كتير فى كتابة المراجع وفهرستها وسهولة الحصول على المرجع فى اى وقت وسهولة تغيير نمط كتابة المراجع فى حالة تغيير نظام التوثيق بمجرد ضغطه..
وده لينك للى حابب يحمله ويستفيد منه ودعواتكم بالصلاح والهداية
وف طريقه اخيره كمان ممكن تكتب اسم البحث وتعمل سرش ف جوجل سكولار وتتأكد من اسم العالم مضبوط للبحث ده هتلاقي تحت علامه زي دي ( ,, ) هتضغط عليها هتلاقي ف كذا صيغه لكتابه الرفرنس شوف الطريقه المتبعة ف كليتك وانسخها وأحيانا ف بعض الكليات بتحتاج تعدل عليها تعديل بسيط ف راجعها قبل ما تنسخها في رسالتك..
15-الملخص العربي
وده بتكتب فيه ملخص باللغة العربية بصوره مبسطة لكل ماتم كتابته ف الرساله يعني برضه بتكتب مقدمه والشغل العملي بتاعك والنتائج اللي توصلت ليها بصوره خفيفيه وسريعة , وف الاخير بتكتب التوصيات بتعتك .
ارجو ان اكون قدرت اوصل المعلومه بصوره مبسطه ومفهومه وتفيدكم جميعا
وبعتذر عن الإطاله بس كان لازم اوضح كل النقاط للإستفاده منها
ف ناس عندهم اختلافات ف الرساله زي جزء التوصيات بتكون ف جزء منفصل عن الملخص العربي ..
واكيد كل كليه ليها نظامها اللي بتتبعه وغير رأي المشرف طبعا .
ف انا عملت البوست لمجرد المساعده للناس اللي تايهه ف الكتابه لان انا شخصيا عانيت عبال ما اتعلمت كل ده وعرفت اكتب، ف بعد اذنكم ترجعوا للرسائل المنشوره في المكتبه وترجعوا للمشرف وبعدين تشوفوا البوست ده للمساعده مش اكثر
وبالتوفيق للجميع 
ليست هناك تعليقات:
إرسال تعليق