أخى الباحث اللى مناقشتك خلاص قربت ركز معايا:
1- الف مبروك مقدماً فقد حان وقت الحصاد ...أوعى تقلق خالص يوم مناقشتك هو يوم عيد بالنسبة ليك مش يوم القيامة وهتقف للحساب لأ خالص ده يوم عيد ويوم إحتفال خلى المعلومة دى فى دماغك وماتخفش ماحدش بيترفض إلا اللى مش عامل رسالة أصلاً ...
2- يوم مناقشتك اوعى تسيب حاجه للظروف خليك عامل حساب لكل حاجه يعنى مثلاً خلى معاك لاب توب للعرض ولاب تانى إحتياطى تحسباً لإى ظروف ...إنزل من بيتك قبل ميعادك بفترة كبيرة علشان توصل بدرى...وهكذا
3- الأهـــــــــــــــــــم بقى هتبدأ إزاى ....
أولاً ................لازم توجه الشكر للمشرف الأول وبعدين لجنة المناقشة وياريت لو فيه أبيات شعر مؤثرة تشد الإنتباه للثناء والشكر...ثم شكر الحضور على تلبية الدعوه ودى فى حدود 3 دقائق أو دقيقتين فقط لا غير أوعى تسرح
ثانياً.................. هتدخل بقى على رسالتك ..فى الأول بلاش سرد للمقدمة حاول تلخص مقدمة الرسالة فى حدود 4 سطور أو 5 بكتير توضح فيها تعريف عام لموضوعك بيتكلم عن إيه.... وإيه هى آخر الدراسات اللى تناولت موضوعك وتناولت إيه وأغفلت إيه وأنت هتضيف إيه..... بلاش سرد جمل وكلمات خليك محدد جداً فى المقدمة....تعريف عام لموضوعك والأبحاث السابقة تناولت إيه فيه وأنت هتضيف إيه
ثالثاً....... خلى بالك إنت وقفت فى الفقرة اللى فاتت عند إنت هتضيف ايه وهنا هتعرض المشكلة الخاصة بموضعك أو ما هى الفجوة اللى تحاول أن تغطيها وهى مشكلة البحث
رابعاً ......هتعرض أهداف البحث أنت عايز توصل لإيه من بحثك
خامسا....لازم تعرض متغيرات البحث وإزاى هتقيس كل متغير منهم
سادسا.....عرض الفروض وهى الحلول المقترحة لحل المشكلة
سابعا........ عرض المجتمع والعينة والأدوات المستخدمة فى الدراسة لتجميع البيانات سواء عن طريق الاستبيان او بيانات ثانوية أخرى
سابعاً ....عرض نتائج البحث الإحصائية ....فى الخطوة دى بقى هتعرض الفرض الأول ثم نتائجه الإحصائية التى توصلت اليها ثم توصياتك التى إستنتجتها من النتيجة الإحصائية ......ثم نفس الكلام مع باقى الفروض
تانى بأقلك خلى بالك والله يوم المناقشة ده يوم عيد ليك وفرح مش يوم القيامة وتقف للحساب لأ خااااااالص وماحدش رسالته بتترفض ولا حاجه كله بيعدى وبيأخد الدرجه وأنت مش أقل من النا اللى أخدت ماجستير ودكتوراه يوم مناقشتك ده اليوم اللى هتحصد فيه مرار وتعب السنوات اللى فاتت من مرمطة لسهر لسفر
أخيراً ...معلش أنا بردوا بأعتذرلك هتأخد كلمتين فى جنابك ...بس مش مشكلة ...أوعى تجادل نهائى مع المناقشين حاضر ونعم وخلاص حتى لو المناقش غلط ....لوطلب منك توضيح وأنت عارف ومتأكد مليون فى المية من إجابتك خلاص رد على السؤال... مش متأكد من إجابتك أسكت خالص وأرجوك اوعى تفتى علشان هتأخد كلمتين فى جنابك تانى ....وخلى بالك رسالتك لازم فيها نقاط ضعف كتير وإنتقادات كتير جدا ...أوعى كثرة الإنتقاد من المناقشين أو أسلوبهم العنيف يخرجك عن شعورك أو يخليك تتوتر ...لأ خالص ده العادى من معظم المناقشين ولازم رسالتك يتم نقدها ولازم ينطلب منك تعديلات فأوعى تخاف أو توتر أثناء المناقشة ..........إستعينوا بالله على قضاء حوائجكم...وأعلموا أن الأمور تجرى بمقادير....وأعلموا أن الله لا يضيع أجر من أحسن العمل ...... بالتوفيق للجميع
ليست هناك تعليقات:
إرسال تعليق